صباح الخير
كيف الشباب؟
شايف كثير لطم و الصراحة حقكم يعني، فالوضع محبط، لكن رجائًا تعاملوا مع المعطيات أسبوع بأسبوع.
اللي بصير طبيعي جدًا، لا هو غضب ولا هو استثناء ولا هو كارثة بشرية، إنما تذبذب موسمي طبيعي معتادين عليه. حتى التوقعات الموسمية ما كانت مبشرة بدرجة كبيرة، و الأرقام المتعلقة بالقطب و التذبذبات الشمالية قلنا مليون مرة ما حتجيبلنا منخفضات لباب دارنا، الموضوع مش بهالبساطة ولا بهالحتمية، و مرينا بكثير تجارب تثبت هالحكي، فليش الاستغراب ما بعرف، لكني متفهم شعوركو، و عشان هيك بحكيلكو خذوها أسبوع بأسبوع و المطر و الثلج جايين طبعًا لا تخافوا.
ديسمبر انشطب، أحسن ما ينشطب يناير أو فبراير عفكرة. و لسا في وقت للموسم تحديثين ثلاث حلوين بقلبوا الدنيا، و التوقعات البعيدة واضح مش ميؤوس منها، فشهر واحد نشط كفيل يغير المزاج و يغير صورة الموسم بذهننا، رغم إنه مش غلط تتصالحوا مع فكرة إنه عادي ممكن ما يكون موسم قوي يعني!
حنتابع معكو النماذج اليومية و الأسبوعية كل فترة انشالله، لا تقلقوش أكثر من اللزوم بس، و كل عام و إنتو بخير